Letteratura Milanese
Scarica! Mp3 Poesia (Interpretazione di Antonio Bozzetti)	Carlo Porta
Desgrazi de Giovannin Bongee De già, lustrissem, che semm sul descors De quij prepotentoni de Frances, Ch’el senta on poo mò adess cossa m’è occors Jer sira, in tra i noeuv e mezza e i des, Giust in quell’ora che vegneva via, Sloffi e stracch come on asen, de bottia. S’eva in contrada de Santa Margaritta E andava inscì, bell bell, come se fa, Ziffoland de per mi su la mia dritta, E quand sont lì al canton dove ghe sta Quel pessee che gh’ha foeura i bej oliv, Me senti tutt a on bott a dì: Chi viv ? Vardi inanz, e hoo capii de l'infilera Di cardón e del strèpet di sciavatt Che s'eva daa in la rondena, e che l'era La rondena senz'olter di crovatt ; E mì, vedend la rondena che ven, Fermem lì senza moeuvem: vala ben ? Quand m'hin adoss, che asquas m'usmen el fiaa, El primm de tucc che l'eva el tamborin, Traccheta! sto asnon porch del Monferaa El me sbaratta in faccia el lanternin E el me fa vedè a on bott só, luna, stell, A ris'c de inorbimm lì come on franguell. S'era tanto dannaa de quella azion Che dininguarda s'el fudess staa on olter ! Basta, on scior ch'eva in pari a sto birbon, (Ch'el sarà staa el sur respettor senz'olter), Dopo avemm ben lumaa, el me dis: Chì siete ? Che mester fate ? In dove andee ? Dicete ! Chi sont ? respondi franco, in dove voo ? Sont galantomm e voo per el fatt mè; Intuitù poeu del mestee che foo, Ghe ven quaj cossa de vorrell savè ? Foo el cavalier, vivi d'entrada, e mò Ghe giontaravel fors quajcoss del sò ? Me par d'avegh parlaa de fioeu polid; N'eel vera ? e pur, fudessel ch'el gh'avess Ona gran volentaa de taccà lid, 0 che in quel dì gh'andass tusscoss in sbiess, El me fa sercià sù de vott o des, E lì el me sona on bon felipp de pes. Hoo faa mi do o tre voeult per rebeccamm. Tant per respondegh anca mi quejcoss, Ma lu el torna de cap a interrogamm In nomo de la legge e el salta el foss ; E in nomo de la legge - già, se sa Sansessia, vala ben ? - boeugna parlà. E lì botta e resposta, e via d'incant: Chi siete ? - Giovannin. - La parentela ? - Bongee. - Che mester fate ? - El lavorant De frust. - Presso de chi ? De Isepp Gabella. - In dove ? - In di Tegnon. - Vee a spass ? - Voo al cobbi. - In cà de voi ? - Sur sì. - Dove ? - Al Carrobbi. - Al Carrobbi ! - In che porta ? - Del piattee. - Al numer? - Vottcent vott. - Pian ? - Terz... E inscì Eel satisfaa mò adess; gha n'hal assee ?... Fussel mò la franchezza mia de mì, 0 ch'el gh'avess pu nient de domandamm El va e el me pienta lì come on salamm. Ah, lustrissem, quest chì l'è anmò on sorbett, L'è un zuccher fioretton resguard al rest; El sentirà mò adess el bel casett Che gh'era pareggiaa depôs a quest: Propi vera, lustrissem, che i battost Hin pront come la tavola di ost. Dopo sto pocch viorin, gris come on sciatt, Corri a cà che no vedi nanch la straa; Foo per dervì el portell, e el troeuvi on tratt Nient olter che avert e sbarattaa... Sta a vedè, dighi subet, che anca chì Gh'è ona gabola anmò contra de mì. Magara inscì el fudess staa on terna al lott, Che almanch sta voeulta ghe lassava el segn ! Voo dent... ciappi la scara... stoo lì on bott, Doo a ment... e senti in sui basij de legn, Dessora inscima, arent al spazzacà, Come sarav on sciabel a soltà. Mi a bon cunt saldo lì: fermem del pè De la scara... e, denanz de ris'cià on pien Col fidamm a andà sù, sbragi: « Chi l'è ? ». Coss'en disel, lustrissem, vala ben ? A cercà rogna inscì per spassass via, Al dì d'incoeu s'è a temp anch quand se sia. Intant nissun respond; e sto tricch tracch El cress, anzi el va adree a vegnì de bass... Ghe soni anmò on « Chi l'è ? » pu masïacch, Ma oh dess, l'è pesg che ne parlà coi sass! infin poeu a quante mai sbragi: Se pò Savè, chi l'è ona voeulta, sì o nò ? Cristo, quanti penser hoo paraa via In quell'atem che s'eva adree a sbragià! M'è fina vegnuu in ment - esussmaria ! - Ch'el fuss el condam reficció de cà, Ch'el compariss lì inscì a fà penitenza De quij pocch ch'el s'è tolt su la conscienza. El fatt l'è ch'el frecass el cress anmò, E senti ona pedana, oltra de quell, Propi d'ona persona che ven giò; Mi, allora, tirem lì attach al portell, Che de reson, s'el se le voeur cavà, L'ha de passà de chì, l'ha de passà. Ghe semm nun chì al busilles ! Finalment Vedi al ciar de la lampeda de straa Avegnimm a la contra on accident D'on cavion frances de quij dannaa, Che inscì ai curt el me diss: Ett vô el marì De quella famm che sta dessora lì ? Mi, muso duro tant e quant e lù, Respondi: Ovì gè suì moà; perché ? Perchè, el repìa, voter famm, monsù, L'è tre giolì, sacher dioeu, e me plè. 0 giolì o non, ghe dighi, l'è la famm De moà de mi: coss'hal mò de cuntamm ? S'è che moà gè voeù coccè con ell. Coccè ? respondi, che coccé d'Egitt ? Ch'el vaga a fà coccé in San Raffaje11 ; Là l'è el loeugh de coccè s'el gh'ha el petitt ! Ch'el vaga foeura di cojon, che chì No gh'è coccé che tegna: avè capì ? Cossa dianzer ghe solta, el dis: Coman, A moà cojon?... e el volza i man per damm. Ovej, ch'el staga requi cont i man, Ch'el varda el fatte sò de no toccamm, Se de nò, dia ne libra, sont capazz... E lu in quel menter mollem on scopazz. E voeuna, e dò ! Sangua de dì de nott, Che nol se slonga d'olter, che ghe doo ! E lu zollem de capp on scopellott! Vedi ch'el tend a spettasciamm el coo, E mi sott cont on anem de lion ... E lu, tonfeta, on olter scopazzon ! Ah sanguanon! A on colp de quella sort Me sont sentuu i cavij a drizzà in pee, E se nol fudess staa che i pover mort M'han juttaa per soa grazia a tornà indree, Se no ciappi on poo d'aria, senza fall Sta voeulta foo on sparposet de cavall.